Ob der Job mer Spass macht? Do muss ich net iwwerlege. Es is, net gelooge, moin Traumberuf.

Am End vun moinere Schulzeit der Tescht beim Arweitsamt. Hot mer de Berufsberater des Ergebnis vorgelese.
"Kerwerlisch un seelisch belaschtbar, net ze schad fer Nacht- un Wocheendärwet, sehr gutes Deitsch, im kaufmännische Rechne topfit, handwerklichi Begawung un, erstaunlich, aach e kinschlerischi Ader, gepaart middem ausgeprägte Gefiehl fer Gestaltung un Dekoration, un doi Eifiehlungsvermeege is iwwerdorchschnittlisch entwickelt."
Der Berater hat e Paus gemacht, von soine Uffzeichnunge uffgeblickt un de Kopp gschiddelt.
"Do gebt's nur ääns: e Ausbildung als Bestatter."
Ich hab gschluckt, awwer, ganz ehrlisch, des misse Se mer werklisch glaawe, kään änzischer Dag hab ich moi Berufswahl bereit.

E vielfältischi Ärwet, un abwechslungsreich. S kummt vor, dass ich midde in de Nacht aagerufe wer. De erscht fremde Mensch, mit dem die Aageheerische redde, des bin ich. Des versteh ich als Auszeichnung. Ständisch ännern sich die Bestattungsrichtlinie, do muss mer ap-tu-däte soi. Neie Rechtsvorschrifte, Hygienebestimmunge, Sicherheitsnorme, Bestattungsrichtlinie, alles im Fluss. Un der ganze Babierkram. Mer muss sich auskenne midde Technik vunde neischte Sargoifahrmaschine. Un wie de Kerwerhewer Hercules an moim neie Sezierdisch bedient werd, ich kann Ihne sage.

An trauwerschwarz kummt mer net vorbei, awwer des is nimmi, wie soll ich sage, zeitgemäß. Letscht Woch bin ich uff de BEFA gewest. Sie kenne die BEFA net, ehrlisch? Die international Bestattungsfachausstellung in Disseldorf, veranstalt vum Bundesverband deitscher Bestatter. Vun wesche schwarz! Pink! Quietschpinkfarwe, alle Debbischbeede. Pink! Des wer DIE Farb fer en Leischewagge, wann Se mich froogen. Ich hab mer jo grad en neier gekaaft. Sie kenne mit dem Mercedes Benz ää- u zwääsärgisch transportiere. Links un rechts en Sarg. Odder ääner allää in de Midde. Was fer Farb moin neier Leischewagge hot? Ich geb's zu, Sie verwische mich uffem falsche Fuß. Schwarz is moin neier Benz. Awwer im Moment kummt mer am Trauerschwarz net verbei. Im Friehjohr soll e scharlachrotes Modell mit 19er Felge uff de Markt kumme.

Ob mehr sich draa gewehnt, ob mer quasi abstumbbt? Was Sie alles wisse wolle. Der Dot losst ehm niemols ganz kalt. Es gebt immer widder Fäll, die ehm unner de Haut gehe, zum Beispiel wann e Kind sterwe dut. Odder beime Selbschtmerder. Mer unnerscheide do zwische sauwere un net so sauwere Suizide. Mit Gift. Des is unprobelmatisch. Odder e klää Leschel in de Schläf. Des is schnell weggschminkt. Awwer ääner mit äänere dicke blooe Zung, ich kann Ihne sage. Oder der Mann vun vorgeschdern, hot sich äfach vor die S-Bahn gschmisse. Do brauche Se Hautklewer un Mundformer un Veredungsstift erscht gar net auszepacke. Un vun wesche kinschtlerischi Ader, des kenne Se vergesse.

Awwer trotzdem, ich bleib debei. Bestatter. Moin Traumberuf. Un als Ausgleich bin ich aktiver Fasnachter bei de Farweschlugger.
 

(c) Walter Landin, 2014