Neilich hab ich en Artikel in de Zeidung gelese.

Der Datenautobahn gehört die Zukunft.

Un do wollt ich ää Mool abtuudät soi, do wollt ich net uff so ääner klääne Landstrooß mit viele Schlaglecher entlangzockle. Liewer im schnelle Schlidde uffem Dateheijwäj. Also kaaf ich mer am neggscde Dag e Modem. Des is en viereckischer Kaschde. Vorne draa sinn viele Lämbscher, die wu blinken. Hinne gehn drei Kawel raus, ääns is fer Strom, des anner geht an de Telefonaaschluss un middem dritte wird der Compjuder verbunne. Un schun isses losgange im Internet. Vun moine klääne Stubb in Mannem aus bin ich iwwer Kapstadt nooch Dermschdää gsörft, en klääner Abstecher nooch San Francisco, en korzer Uffenhalt in Eschelbronn, schnell noch in New York verbeigguckt un iwwer Hongkong zerick. In acht Sekunde sörf ich um die ganz Welt, informier mich iwwer des Kinoprogramm in London, nemm annere Njuusgruup middem Islänner, em Chines un em Schwoob teil, lad mer schnell die neischt Version vun moin Brauser außem Internet uff moin Rechner.

 

Un des Schänschde am weltweite Netz, ehr Leit, des sinn die Iemääls. Des is die elektronisch Poscht. Ich lad den Gerhard in Frankethal zum Spargelesse oi, schick die Noochricht los, iwwer viele Compjuder in de ganze Welt landet der Brief e paar Sekunde speter in de Määlbox vum Gerhard in Frankethal, Määlbox, des is sowas wie en elektronischer Briefkaschde, de Gerhard fräät sich un mäält zerick, dass er kummt. Neilich hab ich dem Mimo aus Campese des neischde Paschda-Rezept gemäält. Der hot sich iwwerschwenglich bedankt. Rruck zuck geht des. Un alles uhne deire Briefmarke. An moim Gebortsdag hab ich Grieß aus Kyoto gekriegt, des liegt in Japan, vunnem Makoto Tsuji.

Tudäj is speschel däj. Hoop juu häve e guud däj, hot do gstanne.

Wuuher wääßen der Makoto aus Kyoto, wann ich Gebortsdag hab? Des grenzt jo an Zauwerei.

Vadder, hot moin Bu do gemäänt, stell dich net so aa. S gebt do so e Gebortsdagsregischder. Un do hab ich doin Gebortsdag oigetrage. Des hot mit Zauwerei nix ze due.

 

Also, ehr Leit, des mit denne Iemääls hot mer jo werklisch gfalle. Alle moine Bekannte, die wu e Modem hawwe, hab ich jeden Dag e Iemääl gschickt. Am Aafang hawwe se all geantwort. Ich muss zugewwe, e bissel hot die Begeischderung noochgelosst. Un jeden Dag kammer aa net immer jemand oilade. Letscht Woch hab ich dann e Iemääl gekriegt, do isses mer mulmisch worre. Die Iemääl is so gange:

 

An alle Freundinnen und Freunde!

Ich möchte euch alle warnen! Heute habe ich Informationen erhalten über Viren aus dem Internet. Wenn ihr die Email mit dem Betreff Good Times erhaltet, dürft ihr sie unter keinen Umständen öffnen. Ihr müsst sie auf der Stelle löschen. Die Email ist mit einem teuflischen Virus infiziert, der die Festplatte zerstört. Und wenn die Kaputt ist, wird der Prozessor in einen INFINITE BINARY LOOP gesetzt. Davon erholt sich der Prozessor nicht mehr. Also, nicht vergessen: Wenn ihr die Good-Times-Email bekommt, sofort weg damit!

 

Also, ehr Leit, des hot mich jo schun gschockt. Was en infinit bEinEry LUUp is, des hot do net gstanne, awwer dass de Prozesser des Herzstick vun dem Compjuder is, des wääß jedes Kind. Un wann der hie is, laaft nix mehr. Ich bin echt fertisch gewest. Mer wääß jo, dorch de Weltraum fliege Satelitte un Schrott un Mill un lauter so Glumb. Awwer dass Bazille dorch’s Internet segle, des is mer nei gewest. Wire mache die Feschtblatt kabutt, kille de Prozesser. Un du kannscht nix mache. Do stehscht newedraa un kannscht absolut nix mache. Ich hab mich erscht gar nimmi getraut, moin Compjuder un moi Modem oizeschalte. Awwer dann hab ich gedenkt, du hoscht e Verantwortung, du muscht all doi Bekannte un Freinde warne. Seitdem verschick ich Iemääls mit Warnunge vor dem Guud-Teimes-Bazillus.

 

Awwer des Schlimmschde, ehr Leit, des wisst ehr jo noch gar net. Grad heit Morge is in moiner Määlbox e Nochricht gewest. Der Intel-Pentium-Prozesser det in ännere Sekund viele Milljone Recheoperatione dorchfiehre. Hot do gstanne. Intel is e großi Firma, die wu so Prozesser herstellt, en Marktfiehrer, sagt mer dodezu. Intel Inseid, die Werwung, wu mer innem Diefflieger dorch des Innerlewe vun som Compjuder saust, die Werwung kennt ehr doch. Un weil der Intel-Prozesser so viel denke misst, det er hääß werre. Hot do gstanne. Des wääß mer jo, wann mer zeviel denkt, raacht ehm de Kopp. Un demit der Prozesser e bissel Kiehlung kriegt, gebt’s en Lifter, so en klääner Ventilator. Der is uff dem Prozesser druffgeklemmt. Hot do gstanne. Hab ich alles schun gewisst, hab ich noch fer mich gedenkt, ich wääß gar net, was des soll, hab ich mer noch gesaat. Schicke die ehm e Iemääl mit lauter so Binseweisheite. Was sollen des? Ich wollt schun nimmi weiterlese und die Iemääl in de Babierkorb schmeiße, also des is kään rischdischer Babierkorb, mehr so en elektronischer, en virtueller Babierkorb, misst ehr eich vorstelle.

 

Awwer dann, ehr Leit, dann isses kumme. Vum Intel-Prozesser det’s e uudokumentierti Funktion gewwe, uudokumentiert, des is wann’s nirgendwu uffgschriwwe is, falls des jemand net wääß. Wann der Compjuder viel rechne misst, so viel, dass der Prozesser ganz hääß werd, so hääß, dass der klää Lifter aa nix mehr helfe det, dann wer in dem Lifter e Berieselungsaalag oigebaut. Hot do gstanne. Un die det dann aktiv werre. En Lifter mit Berieselungsaalag, also mol ehrlisch, ehr Leit, habt ehr des gewisst? Ich geb’s ehrlich zu, ich hab des net gewisst. Mer sinn nur die Hochhaiser in denne Katastrofefilme oigfalle. Wann’s do aafangt ze raache odder ze brenne, dann gehn vun de Deck die Springbrunne los. So muss des aa beim Compjuder soi, hab ich mer gedenkt. Also, ehr Leit, die Berieselungsaalag werd aktiv un der hääße Prozesser werd nimmi mit Luft sundern mit Wasser gekiehlt.

 

Was kammer do mache? S det zwää Meglichkeite gewwe. Hot do gstanne. Mer sollt ganz schnell de Haupthahn vunde Wasserleitdung abstelle. Awwer der wer jo meischdens im Keller, un bis mer do nunnergerennt is, do wer’s schun lengscht ze spet. Also det nur die zwett Meglichkeit iwwerisch bleiwe. Un grad jetzern im Summer, wu’s doch so hääß is, wer die Meglichkeit echt Spitze. Mer sollt soi Badehosse odder soin Bikini aaziehe un sollt sich bequem unner de Schreibtisch legge. Un net lang denooch det e wunnerschääni Kiehlung vun owwe kumme. Mer misst sich norre e bissel beeile middem Umziehe. Hot ganz am Schluss vun derre Iemääl gstanne. Die uudokumendiert Funktion vum Intel-Prozesser det nemlich dorch die Iemääl selbscht aktiviert werre. Wann in der Iemääl IWWERSCHWEMMUNG als Iwwerschrift stehe det un wammer die Iemääl bis zu dere Stell gelese het... Weiter bin ich nimmi kumme, weil uff äämol isses feicht worre an moine Fieß. Un dodebei hab ich noch net emol die Badehosse aaghabt.

 

Also, ehr Leit, ich muss zugewwe, s is e echti Abkiehlung gewest. Zum Surfe daugt moin Compjuder nimmi viel, awwer der klääne Lifter mit dere Berieselungsaalag, der funktioniert noch oiwandfrei. Wann ich e Abkiehlung brauch, muss ich norre die Iemääl vun der IWWERSCHWEMMUNG lese.